Link açıqlığı

Qırımnıñ öz başına tayin etilgen baş naziri Sergey Aksönov yarımadada kurort mevsimi başlanmazdan evel plâjlarnıñ açıq olmasınen bağlı mesele çezilecek, dep ayta.

Bunı o, jurnalistlerge bildirdi, dep haber ete Nazirler şurasınıñ matbuat hızmeti.

Aksönovnıñ aytqanına köre, turistik mevsimi arfesinde Qırımda yarımada plâjlarınıñ inventarizatsiyası yapıldı. Prokuratura, militsiya, mal-mülk Fondu ve Qırım kurort ve turizm Nazirliginiñ hadimleri yalı boyuna barıp keldiler.

Qırımnıñ yalı boyunda qanunsız alda qora tiklegen grajdanlar ve müessiseler mayısnıñ 1-ne qadar vaziyetni deñiştirmeli.

«Bundan soñra «Qırım halq imayesi» bu plâjlarğa barıp, bütün qoralarnı pıçıp çıqar. Deñiz adamlar içün açıq olacaq», – dep bildirdi Aksönov.

Qırımlılar ve yarımada musafirleri er yıl deñizge serbest kiriş problemlerine rastkele. Bazı vaqıtları adamlar qanunsız alda yalı kirişini qapatıp, raatlanğanlardan para alalar.
XS
SM
MD
LG