«Veciye Kaşka davasınıñ» mabüsi Bekir Degermenciniñ tuvğanları şübheli sayılğan bütün mabüsler SİZOdan ev apsine avuştırılğan Aqmescitteki mahkeme binasına kelip, olarğa qoltutqan er keske minnetdarlığını bildirdi.
«Bu quvanç közyaşları, añlatıp olamayım. Bu vaqıt devamında yanımızda olğan er keske minnetdarlığımnı bildirmege isteyim. Siziñ destegiñiz bizge küç berdi. Elbet, bu ev apsi, qorantamızda ekinci kere ola (Bekir Degermenciniñ oğlu Mustafa «fevral 26 davasınıñ» mabüsi ola – QA). Amma kene de baht, bugün gece babam evde yuqlaycaq», – dep ayttı Bekir Degermenciniñ qızı Mavile.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
