Türkiyeniñ Qırımnıñ Rusiye ilhaqı meselesinde qararı deñişmedi: Ankara onı tanımadı ve tanımaycaq.
Bu aqta Ukrainanıñ Türkiye elçisi Andriy Sıbiğa yolbaşçılığında Ukraina diplomatları gruppasınıñ Türkiye-Ukraina parlamentler arası dostluq gruppası ile körüşüvinde Adalet ve Kalkınma Partisiniñ deputatı Tuğrul Türkeş bildirdi, dep haber ete «Ukrinform» Ukraina haber agentligi.
«Qırımnıñ Rusiye tarafından ilhaqını qabul etmedik, etmeymiz. Bu meselede bir deñişme yoq. Bu meselede qararlığımız ve israrımıznı devam ettirecekmiz», – dedi Türkeş.
Ukraina diplomatlarınıñ Türkiye ve Ukraina parlamentler arası dostluq gruppası ile körüşüvinde Ukraina-Türkiye munasebetleriniñ aktual meseleleri ve olarnı inkişaf ettilüvi yolları muzakere etildi. Körüşüv fevralniñ 3-ne planlaştırılğan Türkiye prezidenti Recep Tayyip Erdoğannıñ Ukraina ve Türkiye arasında yüksek seviyeli Strategik Şurasınıñ toplaşuvı çerçivesinde Kyiv ziyareti arfesinde kerçekleştirildi.
2019 senesi fevral ayında Türkiye Tış işler naziri Mevlüt Çavuşoğlu o vaqıt Ukraina tış işler naziri olğan Pavlo Klimkinnen beraber Odesada keçirgen matbuat konferentsiyasında Türkiye Ukraina topraq bütünligi ve sıñırlar deñişmeycegine qoltuta ve qırımtatarlarnı qoruycaq, dep bildirgen edi. Onıñ qayd etkenine köre, Ankara «Qırım ilhaqını takbih ete ve onı iç bir vaqıt qabul etmeycek».
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
