Sudaqta eki yaşında qızçıq vefat etti. Tuvğanları emin ki: balağa kerekli yardım kösterilmedi. Amina Osmanovağa «keskin nefes virus yuqunçı, atsetonemik al» diagnozı qoyuldı, hastahanege almadılar. Cinaiy dava açıldı. Qırım sağlıq nazirligi bildirgenine köre, iç teşkerüv keçirile.
Elzara Osmanova noyabr altısınıñ er daqqasını hatırlay. Bundan bir kün ögüne eki yaşında qızı Aminanı Taraqtaş (Daçnoye) köyündeki bala ekimine kösterdi. Anasınıñ aytqanına köre, balanıñ sıcağı yüksek olmadı ve boğazı biraz qızarğan edi. Qızçıq sıq-sıq siymege istegenini aytqan edi. Evde yazılğan antibiotik berip başladılar, saba talillernen Sudaq şeerine ketkenler. Kündüz Elzara Osmanova talil neticelerini aldı, tanış tibbiy hadimlerine yolladı.
Aqşamğa Amina qusıp başladı, qoranta Sudaq hastahanesiniñ qabul bölügine ketti. Nevbetçi ekim balanı baqtı.
Hastahane qapalı, bölük qapalı, dep aytqanlarElzara Osmanova
«Bala ekimini çağırmadılar, hastahanege yatqızmadılar. Hastahane qapalı, bölük qapalı, dep aytqanlar. Qusmasın dep ine urğanlar: no-şpa ve tserukal. «Alı daa beter olsa?» dep soradım. «Bölük qapalı, fenalaşmaycaq, evge barıñız, bol-bol suv içsin degenler», – dep ayta Aminanıñ anası.
Elzaranıñ aytqanına köre, qızınıñ qandaki oksigen seviyesi bile baqılmadı. O, balanıñ hucur bir nefes alması bar dep, buña diqqat etmesini rica etti.
Qandaki oksigen seviyesi baqılmadı, qan basımı ölçelmediElzara Osmanova
«Bir şey tura sanki, dedim. Diñledi, boğazını baqtı. Bu bile olarnıñ diqqatını celp etmedi, rentgen yaptırmadılar. Qandaki oksigen seviyesi baqılmadı, qan basımı ölçelmedi», – dep qayd ete Elzara.
Qadınnıñ aytqanına köre, olar evge qaytqanınen Amina yaramadı. Qoranta hastahanege qayttı.
«Qusmağa başladı, bu közçikler… pek qorqtım. Feldşer dey: mına, kene qayttı. Ya qayda barayım?! Qayda muracaat eteyim?!», – dep ayta Elzara.
Ekinci kere kelgende Aminanı cerrah da baqtı. Ve bundan soñ bala ekimini çağırdılar. Elzaranıñ aytqanına köre, onı qırq daqqadan çoq beklediler, soñra kâğıtlarnı çoq toldurdılar. Aminağa kimse tamçılıq taqıp olamağan: damarını tapamağanlar. Neticede ana ve qız bala bölüginiñ odasına alıp ketildi.
Közlerine baqsam, sırlı közlerine, birden qaverenki olğanElzara Osmanova
«De suv, de evge ketmege, de babasına istedi. Soñ alıp qızdıracaq edim onı, çünki artıq qol ve ayaqları pek suvuq edi. Közlerine baqsam, sırlı közlerine, birden qaverenki olğan. Qıçırıp başladım: «Yardım etiñiz, yardım etiñiz, yaramay!». Emşire ayta: «Aşağı çapamız, reanimatsiyağa», – dep ağlap ayta Elzara.
Aminanıñ ölüm sebebi ne edi?
Elzara Aminanı reanimatsiyağa alıp ketti. Amma, onıñ aytqanına köre, olarnı kirsetmediler, çünki anda koronavirus hastaları yata. Balanı tedaviy odasına setke yatqızğanlar. Elzara odağa telefon almağa çaptı, sanitar aviatsiyanı çağırmaq içün telefon etmegen yeri qalmadı. Amma Amina tezden can berdi. Mahkeme-tibbiy ekspertiza malümatına köre, ölüm belli olmağan pnevmoniya sebebinden toksik şok neticesinde oldı.
«Gistologik neticelerni bekleymiz. Tahqiqatçılar bunı bile bermedi… Aqmescitte ya da Aqyarda mustaqil mahkeme-tibbiy ekspert yarıp baqsın istedik. Bala hasta, amma yüre, evge istegenini ayta edi, soñunace laf etti, añlaysıñızmı?», – dep añlata Elzara.
Mahkeme-tibbiy ekspert hulâsasında patologik esnas 30 daqqa devam etti, belli olmağan pnevmoniya ise beş kün oldı, dep aytıla. Elzara qızınıñ soñki daqqaları ekimler ne yapqanını körmedi, amma onı qurtarmağa tırışqanlarına inanmay.
«Eki ekim çıqtı. «Biz qurtarmağa tırıştıq, bir şeyler yaptıq» bile demediler. «Daa yaşsıñız, sabır etiñiz» degenler. «Keskin nefes virus yuqunçı, atsetonemik al» diagnozını qoyğan ve qandaki oksigenni, qan basımını ölçmegen, rentgen yaptırmağan, başqa bir tedqiq istemegen, bir şey yapmağan ekimler reanimatsion areket yapa bildimi?», – dep ayta Aminanıñ anası.
Elzaranıñ aytqanına köre, mahkeme-tibbiy ekspertiza malümatına köre, balanıñ sol aqcigeri endi yoq edi. O, üç ekim bu aqciger çalışmağanını nasıl eşitmegenini añlap olamay.
Bu yalıñız ekimlerniñ emalıElzara Osmanova
«Yarıp baquvda bir şey yoq edi, bir şey. Aqcigeri zarar kördi, amma üç ekimden birisi bile bunı aytmadı… Men ekim degilim, bir şey eşitirip, körerim dep tüşünmeyim. Rentgen, ultrases talili cihazı, bir sıra talil olğan yigirmi birinci asırda olar bir şey yapmadılar, yardım etmediler. Hastahane reberligi, Sudaq memuriyetiniñ yolbaşçısı, Qırım Cumhuriyetiniñ yolbaşçısı qayda baqalar, qayda? Bu ekimler olğan ilk adise de degil. İnsanlar maña aynı ekimlerniñ iştiraki ile böyle adiseler olğanını yazıp başladı. Bu yalıñız ekimlerniñ emalı. Anda ne içün oturğanlarını unutqanlar. Pandemiyadan evel de aynı edi», – dep eminliknen ayta Elzara Osmanova.
Qoranta advokatı Mammet Mambetovnıñ aytqanına köre, «zenaat vazifeleriniñ kerekli kibi yerine ketirmeme» maddesine istinaden cinaiy dava açıldı.
Tahqiqat komiteti eki yaşında Amina Osmanovanıñ ölüminen bağlı cinaiy dava açtıMammet Mambetov
«(Rusiye – QA) Tahqiqat komiteti Rusiye Ceza kodeksiniñ 109 maddesiniñ 2-nci qısmına (Şahısnıñ muqayt olmayıp, vazifelerini yerine ketirmeme ve ölüm sebebi olma) istinaden Sudaq şeer hastahanesiniñ qabul bölüginde eki yaşında Amina Osmanovanıñ ölüminen bağlı cinaiy dava açtı. Dekabrniñ 1-nde Sudaq şeerinde keçirilgen tahqiqat tedbirleri vaqtında meni ve müvekkilim Osmanova Elzara Ernesovnanı cinaiy dava açılğanına, onıñ zarar körgen taraf olaraq tanılmasına ve çeşit mahkeme-tibbiy ekspertiza yapılacağına dair qararlarnen tanıştırıp, sorğuğa çekkenler», – dep yazdı advokat Mammet Mambetov Facebook saifesinde.
Qırım.Aqiqat, Qırımdaki Rusiye Tahqiqat komitetine muracaat etip, keçirilgen ekspertizalar ve şübheliler aqqında soradı. Maqale derc etilgende muarririyet daa cevap almadı.
Hastahane hadimleri ve idaresi adiseni açıq şekilde izaatlamay.
Rusiye kontrolindeki Qırım sağlıq nazirligi bildirgenine köre, Aminanıñ ölüminde ekimlerniñ qabaatı barmı dep bilmek içün iç teşkerüv keçire.
Bütün mesüliyetnen bildirem – kimse kimseni qorumaycaqAleksandr Ostapenko
«Bütün mesüliyetnen bildirem – kimse kimseni qorumaycaq. Ekimlerniñ işinde emallıq ve hastalarğa diqqatsız munasebetke yer yoq. Eminim, tahqiqatçılar mahkeme-tibbiy ekspertlernen beraber çalışıp, bu adisede tibbiy hadimlerniñ qabaatı barmı dep baqacaqlar», – dep bildirdi Facebook saifesinde Aleksandr Ostapenko.
Qırım.Aqiqat, Sağlıq nazirligine muracaat yollap, teşkerüv neticeleri aqqında ve Amina Osmanova vefat etkende bölük çalışa edimi dep soradı. Nazirlik muracaat qabul etilgenini tasdıqladı, amma maqale derc etilgende cevap daa yoq edi.
Nazirlikniñ matbuat hızmeti «Krıminform» agentligine bildirgenine köre, Sudaq hastahanesiniñ bala bölügi çalışa, anda 15 yer bar, bir ekim çalışa (o, vazifesiniñ dörtte birini yapa), orta ve küçük tibbiy hadimleri bar.
Qırım.Aqiqat, bu maqalede añılğan bütün taraflarğa fikirlerini bildirmelerine imkân bermege azır
