"Qırım birdemligi" birleşmesiniñ koordinatorlarından birisi, ekinci Bağçasaray "Hizb ut-Tahrir davası"nıñ iştirakçisi Server Mustafayevniñ anası, oğlunı ilk sefer Rostov-na-Donu şeeriniñ SİZOsında ziyaret etti.
Venera Mustafayeva bildirgeni kibi, Server şimdi 12 adamlıq kamerada tutula, amma SİZOdaki ağır şaraitler aqqında aytmağa istemey.
"Server, bu bizim küreşimiz, dep saya. Onıñ içün şaraitler ne olsa da, olar sabır etip, küreşni devam etecekler", - aytıp berdi o.
Venera Mustafayeva, olar qırımtatarca laf etkenleri içün körüşüv vaqtında telefonlar çalışmayıp başladı, dep qayd etti.
"Biz laf etkende, telefonlar ne içündir çalışmayıp başladı. Biz onı tüzetmege tırıştıq, tellerni çektik, amma bu yardım etmedi, ep bir biri-birimizni eşirmedik. Men qapığa barıp, qaqtım, bir qadın çıqtı. Men oña muracaat ettim: "Telefonlar çalışmayıp başladı. Bir şey eşitilmey". O ise: "Siz ana tiliñizde laf ete ediñiz, onıñ içün biz söndürdik", - dep cevaplandı. Men dedim: "Siz evelden aytmadıñız da. Böyle laf etmege mümkün olmağanını aytmadıñız da". Qadın: "Qapıda yazılğan edi. Siz körmek kerek ediñiz", - dep ayttı", - terif ete Venera Mustafayeva.
Noyabr 15-inde Rostov-na-Donu şeeri Cenübiy okrugınıñ arbiy mahkemesi, ekinci Bağçasaray "Hizb ut-Tahrir davası"nı baqıp başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
