Beyaz evde, Ukrayinağa yardım şimdi kerek, Milât bayramlarından soñ degil, dep bildirdiler. Bu aqta matbuat brifing vaqtında Beyaz evniñ Milliy telükesizlik şurasınıñ koordinatorı Jon Kirbi bildirdi.
"Deşetli ve zalım istilâsını başlağanından aman-aman 20 ay keçken soñ, Putin, Ukrayinadaki tecavuzı bitmeycegini ve barışıq tek, "biz maqsadlarımızğa irişken soñ" olacağını bildirdi. Sözniñ soñu. Bunıñ ne demek olğanını epimiz bilemiz", - dedi o brifing vaqtında.
Kirbi, aylar devamında Ukrayinağa kritik yardımnı rein olaraq tutqan Temsilciler Palatasınıñ cumhuriyetçileriniñ Putinniñ beyanatını açıq-aydın eşitkenlerine ümüt etkenini bildirdi.
O, Temsilciler palatasınıñ azaları bu afta evlerine bayramğa ketecek, ukrayin halqı ise küreşini devam etecek ve Rusiye tarafından daa çoq ücümge oğraycaq, dep qayd etti.
''Olarnıñ bizim yardımımızğa ihtiyacı bar. Ve bu olarğa şimdi kerek, yumurta likörinden soñ degil. Sizni kederlendirmek ya da fikriñizni deñiştirmek içün bu yeterli olmasa, öz menfaatlarımız aqqında tüşünmek kerek. Biz bilemiz ki, Ukrayinada olğan şeyler tek Ukrayinada degil. Bu başqasınıñ cenki degil", - dep qayd etti Kirbi.
Al-azırda Joe Biden tarafından teklif etilgen Ukrayinağa 60 milliard dollardan ziyade yardım Amerika qanun çıqarıcıları tarafından blok etilmege devam ete. Em Beyaz ev, em de Ukrayina akimiyeti, bu Rusiye istilâsına qarşı küreş içün telükeli olğanını defalarca aytqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
