Rusiye prezidenti Vladimir Putinniñ matbuat kâtibi Dmitriy Peskov martnıñ 29-nda keçirilgen brifing vaqtında, Moskva "daa keniş köntekstte cenkniñ" yaqında bitecegini beklemegenini bildirdi. Böylece, spiker 2023 senesi Ukrayinağa qarşı arbiy areketlerniñ toqtatılması istiqballeri aqqında sualge cevap berdi.
"Bu degerlendirmelerni Mahsus arbiy operatsiya (böyle Rusiye Ukrayinağa qarşı cenkni adlandıra) ile oğraşqan Mudafaa nazirliginiñ mütehassısları bermeliler. Eger keniş köntekstte cenk aqqında sorağan olsañız, duşman devletler ile qarşı turuv, bu memleketimizge qarşı başlatılğan melez cenktir ve bu çoqqa baracaq. Ve mında metanet, sadıqlıq, maqsatkârlıq ve prezident etrafında birleşüv kerek", - dedi o.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
