Ukrayina mudafaa naziri Rustem Ümerov Pentagonnıñ yañı yolbaşçısı Pit Hegsetniñ iştiragi ile Ukrayina-NATO Şurasınıñ toplaşuvına keldi. Ümerov keçen künü Pit Hegset ile eki taraflı körüş keçirdi, bugün ise Ukrayinağa ittifaqdaşlarnıñ yardımı devam ete, dep işandırdı.
"Bizim diqqatımız telükesizlik saasında yardım etüvdir. Bütün ittifaqdaşlar buña qol tutqanını köremiz, ABD telükesizlik saasında bizge yardım etmege devam ete, NATO telükesizlik ve talim saasında yardımımıznı özüne ala, şunıñ içün bu endi yapıla, bu qarar alındı", — dep ayttı Ümerov.
Aynı zamanda, NATO baş kâtibi Mark Rütte Ukrayinağa daa küçlü muzakere pozitsiyasında olmağa yardım etmek kerek olğanını tekrarladı. Saba jurnalistlerniñ Rüttege, ABD Ukrayinanıñ NATO azası olması ve kelecekte barışıq añlaşmasında topraqlarnıñ qaytarıluvı kerçek olmağanını açıqtan bildirerek, Ukrayinanıñ muzakere mevamını zayıflatıp olamadımı degen sualine, Rütte, ABD, AB kibi, Ukrayinada devamlı barışıq olmasını istegenini bildirdi.
"Mevzularnıñ yaqınlaşuvı körüne. Epimiz Ukrayinada tezden barışıq olmasını isteymiz, epimiz Ukrayina muzakereler başlağanda eñ yahşı alda olmasını isteymiz, muzakereler muvafaqiyetli bitsin, ve, - tünevin ABD yañı mudafaa naziri Pit Heggett aytqanı kibi, - muzakerelerniñ neticesi küçlü ve devamlı olması pek müimdir", — dep bildirid Rütte.
Fevral 12-de Brükselde ABD-de akimiyet deñişken soñ Ukrayina mudafaası boyunca Kontakt gruppasınıñ ilk toplaşuvı "Ramştayn" formatında olıp keçti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
