Ukrayinanıñ Büyük Britaniyadaki elçisi Vadım Prıstayko, Boris Johnsonnıñ istifasından soñ Büyük Britaniyanıñ destegi deñişmeycegini bildirdi.
"Britaniyada unikal bir şey bar, Ukrayinağa yardımnıñ azlaştırılmasına em şimdiki ükümet azaları, em muhalifet yol bermez. Çünki olar umumiy menfaatlarnı qaorçalay. Ve Ukrayina Britaniya içün umumiy menafaattır", - dedi o.
Elçiniñ qayd etkeni kibi, Ukrayinanı em Britaniya ükümeti, em cemiyet destekley.
Büyük Britaniya baş naziri Boris Johnson istifası aqqında iyülniñ 7-nde ilân etti.
Bu vazifede o 2019 senesi dekabr ayından bulundı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
