Büyük Britaniyanıñ Ukraina elçihanesi yanvarniñ 20-nde aqşam Britaniya ükümeti vekiliniñ Ukraina milliy timsaliniñ Britaniya politsiyası tizgen «Ekstremizm ile küreş reberinde» peyda olmasınen bağlı beyanatını paylaştı, dep haber ete Azatlıq Radiosı.
«Ukraina perunınıñ Britaniya politsiyasınıñ «qullanmasında» peyda olmasınen ketirgen can ağrısını añlay ve peşman etemiz. Politsiyanıñ bildirgenine köre, vesiqada reberdeki timsallerniñ bir çoqu terrorizm ile küreşnen bağlı degil, dep qayd etile. Britaniya akimiyeti Ukraina devletçiliginiñ resmiy timsalleri, hususan devlet bayrağı, tuğrası ve Ukraina gimnini pek ürmet ete. Bilemiz ki, perunnıñ Ukraina tuğrasınıñ esas elementi olaraq Ukraina halqı içün anayasa, tarihiy ve medeniy emiyeti bar», – dep aytıla beyanatta.
Aynı vaqıtta vesiqada yanında natsist timsalleri olğan perun cedvelden alınacaqmı aytılmay.
Büyük Britaniyanıñ kütleviy haber vastaları Britaniya uquq qoruyıcı organları tarafından tarqatılğan «Ekstremizm ile küreş qılavuzına» Ukraina tuğrası – perun – qoşulğanını bildirgen soñ, Ukraina Tış işler nazirligi yanvarniñ 20-nde resmiy beyanatını aydınlattı.
Ukrainanıñ Büyük Britaniya elçihanesi, Büyük Britaniyanıñ terror ile küreş politsiyasından Ukraina tuğrasını ekstremist timsalleri cedvelinden alıp taşlamasını talap etti.
Yanvarniñ 17-nde The Guardian Britaniya neşiri Büyük Britaniyanıñ terror ile küreş politsiyası tizgen ekstremist timsalleriniñ cedvelini derc etti. «Sağ radikal timsaller» örnekleri arasında ukrain perun şeklinde tatu tapmaq mümkün, «beyaz suprematizmciler» taqımları arasında ise – «Azov» ukrain batalyonınıñ işareti.
Bundan ğayrı, kütleviy haber vastalarınıñ diqqatını cedvelniñ diger detalleri de celp etti – meselâ, qullanmalarda «Etraftaki müitni imaye timsalleri ve gruppaları» bölügi bar, anda etraftaki müitni qoruğan Greenpeace ve Extinction Rebellion teşkilâtları kirdi.
2019 senesi küzde 39 amerikalı kongressmen Ukraina Milliy gvardiyasınıñ alayı olğan «Azov» batalyonını terror teşkilâtları cedveline kirsetmege çağırdı. «Azov» azaları bu muracaatnı «Ukrainağa qarşı informatsion ücüm» dep adlandırdı.
