Büyük Britaniyanıñ Ukraina elçihanesi, Büyük Britaniyanıñ terrornen küreş politsiyasından Ukraina tuğrasını (perunnı) ekstremist timsalleri cedvelinden çıqarmasını talap ete. Bu aqta elçihane yanvarniñ 19-nda bildirdi, dep haber ete Azatlıq Radiosı.
Diplomatik müessise, jurnalistler aydınlatqan oca ve ekimler içün qullanmalardaki sağ radikal areketler timsalleriniñ örnekleri arasında perun şeklinde tatuğa diqqat celp etti.
«Anayasada milliy timsal ve Ukraina devlet tuğrası olaraq qayd etilgen perunnıñ «Ekstremizm ile küreş qılavuzına» kirsetilmesi açuvlandıra, onı terror ile küreş politsiyası oca ve ekimler içün çıqardı. Mında aqlav olamaz. Perunnıñ qılavuzdan çıqarılmasını ve resmiy şekilde afu sorulmasını talap etemiz», – dep aytıla elçihane beyanatında.
Yanvarniñ 17-nde The Guardian Britaniya neşiri Büyük Britaniyanıñ terror ile küreş politsiyası tizgen ekstremist timsalleriniñ cedvelini derc etti. «Sağ radikal timsaller» örnekleri arasında ukrain perun şeklinde tatu tapmaq mümkün, «beyaz suprematizmciler» taqımları arasında ise – «Azov» ukrain batalyonınıñ işareti.
Bundan ğayrı, kütleviy haber vastalarınıñ diqqatını cedvelniñ diger detalleri de celp etti – meselâ, qullanmalarda «Etraftaki müitni imaye timsalleri ve gruppaları» bölügi bar, anda etraftaki müitni qoruğan Greenpeace ve Extinction Rebellion teşkilâtları kirdi.
2019 senesi küzde 39 amerikalı kongressmen Ukraina Milliy gvardiyasınıñ alayı olğan «Azov» batalyonını terror teşkilâtları cedveline kirsetmege çağırdı. «Azov» azaları bu muracaatnı «Ukrainağa qarşı informatsion ücüm» dep adlandırdı.
