Britaniya politsiyası, Ukraina tuğrası – perunnı – ekstremist timsalleri cedvelinden silip çıqardı, dep bildire Ukrainanıñ Büyük Britaniya elçihanesi.
«Ukrainalılarnıñ bir çoq muracaatına cevap olaraq ve Ukraina diplomatlarınıñ işi neticesinde Britaniya politsiyası Ukraina devlet tuğrasını terror ile küreş qılavuzından silip çıqarmağa qarar aldı», – dep aytıla elçihaneniñ Twitter haberinde, haber ete Azatlıq Radiosı.
Büyük Britaniyanıñ telükesizlik meseleleri naziri Brendon Lyuis yanvarniñ 22-nde parlamentte çıqışta bulunıp, Ukrainada «sağ radikal gruppalar milliy timsallerni suistimal ete», dep qayd etti.
Yanvarniñ 17-nde The Guardian Britaniya neşiri Büyük Britaniyanıñ terror ile küreş politsiyası tizgen ekstremist timsalleriniñ cedvelini derc etti. «Sağ radikal timsaller» örnekleri arasında ukrain perun şeklinde tatu tapmaq mümkün, «beyaz suprematizmciler» taqımları arasında ise – «Azov» ukrain batalyonınıñ işareti.
Bundan ğayrı, kütleviy haber vastalarınıñ diqqatını cedvelniñ diger detalleri de celp etti – meselâ, qullanmalarda «Etraftaki müitni imaye timsalleri ve gruppaları» bölügi bar, anda etraftaki müitni qoruğan Greenpeace ve Extinction Rebellion teşkilâtları kirdi.
2019 senesi küzde 39 amerikalı kongressmen Ukraina Milliy gvardiyasınıñ alayı olğan «Azov» batalyonını terror teşkilâtları cedveline kirsetmege çağırdı. «Azov» azaları bu muracaatnı «Ukrainağa qarşı informatsion ücüm» dep adlandırdı.
