Ukrayina Silâlı quvetleri noyabrniñ 29-nda Aqmescitte S-400 ava mudafaası sistemasınıñ elementlerini yoq ettiler, bu ise noyabr ayında S-400 muvafaqiyetli yoq etilgeni aqqında ekinci haberdir, dep bildire Büyük Britaniya Mudafaa nazirligi öz istihbaratına atıf etip.
İçtimaiy ağlarda raketa yaqıtınıñ patlavı aqqında haber etile edi. Britaniya istihbaratınıñ bildirgenine köre, fotoresimlerde 13,5 metrlik eki boru, dağılğan parçalar ve beş qaza-qurtaruv hızmetiniñ maşinası tapıldı.
"Bu, 2024 senesi noyabrniñ 23-nde Kursk vilâyetinde S-400 ZRK yoq etilgenden soñ Ukrayina Silâlı quvetleri tarafından noyabr ayında Rusiyeniñ S-400 ava mudafaası sistemalarınıñ muvafaqiyetli yoq etilmesi aqqında ekinci haberdir", — dep aytıla haberde.
Noyabrniñ 28-nde Ukrayina Mudafaa nazirliginiñ Baş istihbarat idaresi, noyabrniñ 28-nde işğal etilgen Qırımda "Podlöt" Rusiye radar kompleksi yoq etilgenini bildirgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve "ava mudafaa sistemasınıñ işi" dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
