Büyük Britaniya istihbaratı, Rusiyeniñ soñki aftalar arqa cebede, hususan da işğal etilgen Qırımğa yaqlaşma yollarında mudafaa yolaqlar qurmaq içün büyük çareler körmege devam etkenini bildire.
"Bu, Qırımnı Herson vilâyeti ile birleştirgen tar boyun üzerinde, Ermeni Bazar şeeriniñ 3,5 kilometr şimalinde, doquz kilometrge uzanğan büyük istihkamlardır. Bu mudafaa vastaları Rusiye komandanlığı Ukrayina quvetleri doğrudan Qırımğa ücüm ete bilecegini tüşüngenine delâlet ete", - dep yazıla bildirmede.
İstihbaratnıñ bildirgenine köre, Rusiye yarımada üzerindeki nezaretni saqlamaqnı eñ müim siyasiy prioritet kibi körmege devam ete.
Qırım.Aqiqat ve Azatlıq Radiosının "Shemı" leyhası Qırımda Rusiye istihkamlarınıñ yañı satellit resimlerini topladı. Malümatqa köre, eñ çoq istihkam Qırımnıñ şimalindedir. Herson vilâyeti ile memuriy sıñırdan Canköyge qadar mudafaa yolları teşkil etilgen.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
