Britaniya qırıcıları Qara deñiz kökünde Rusiyeniñ «Be-12» gemilerge qarşı uçağınıñ yolunı kestiler. Bunı Büyük Britaniya Mudafaa nazirligi bildire.
Bildirüvge binaen, adise ağustos 23-te olıp keçti. Qırallıq Arbiy ava quvetleriniñ Typhoon uçaqları, Rusiye uçağınıñ ilhaq etilgen Qırımdan çıqıp Qara deñiz kökünde cenüp-ğarp tarafına Şimaliy Atlantika alyansınıñ (NATO) sıñırlarına doğru uçqanına cevaben Romaniyadaki uçaq bazasından avağa köterildiler.
Büyük Britaniyanıñ Mudafaa nazirliginde, bu, bir afta içinde Qara deñizniñ kökünde Rusiye uçağına yol kesüvniñ endi ekinci adisedir, dep qayd ettiler.
Ağustos 22-de Büyük Britaniya, NATOnıñ Qara deñiz üstündeki ava boşluğına yaqınlaşqanda tayin etilgen Rusiyeniñ eki Su-30 qırıcısını taqip etmek içün Romaniyadaki bazadan qırallıq Arbiy ava quvetleriniñ eki uçağınıñ avağa köterilgenini bildirdi.
Ağustos 13-te de NATOnıñ sıñırları yanında Rusiyeniñ 6 Su-24 bombardımancı uçağı bulunğanı içün Britaniya qırıcıları Romaniyadaki bazanıñ avasına köterilgen ediler.
Birleşken Qırallıqnıñ mudafaa naziri Gevin Uilyams: «Bizim NATO ve Avropa telükesizligine sadaqatımız sarsılmaz. İster Qara deñiz ve Baltıq deñizi üstündeki köklerde, ister ise Estoniyanıñ toprağında oluñız, bizim areketlerimiz açıq bir signal yollaylar – biz tecavuznıñ er angi aktına ortaqlaşıp qarşılıq köstermege azırmız ve er angi telükege yol bermemek içün Şarqiy Avropadaki ittifaqdaşlarımızğa qol tutacaqmız», – dep qayd etti.
