Brüsselde oktâbrniñ 6-nda er yıllıq Ukraina-AB sammiti ötkerilecek. Ukraina prezidenti Volodımır Zelenskıy iştirak etmege niyetlene, dep bildirdi keçken afta Prezident ofisi, dep haber ete Azatlıq Radiosı.
Bu, COVID-19 pandemiyası başlağanından berli Avropa Birliginiñ ortaq memleketi ile Brüsselde keçirgen ilk eki taraflı «canlı» sammit olacaqtır.
Avropa Birligi eyyetiniñ başı Avropa şurasınıñ prezidenti Charles Michel ve Avropa komissiyasınıñ prezidenti Ursula Gertrud von der Leyen olacaqlar.
Ursula Gertrud von der Leyen, koronavirus hastasınen bağda olğanı içün izolâtsiya etildi ve oktâbrniñ 6-sı sabasına qadar karantinde olacaq, dep bildirgen edi.
«Liderler Ukraina ve Avropa Birligi munasebetleriniñ prioritetli meselelerini, hususan Birlik añlaşmasınıñ yerine ketirilüvi, Ukraina ve AB arasında sektoral integratsiyanıñ terenleşmesi, COVID-19 pandemiyasınıñ aqibetlerini yeñüv işüirligi ve Ukraina islâatlarınıñ AB tarafından desteklenmesini muzakere etecekler», – dep bildirdi Ukraina prezidentiniñ Ofisi.
Prezident ofisi, Donbastaki telükesizlik vaziyetine diqqat ayırılacaq ve Qırımnı işğalden qurtarmaq ve qırımlılarnıñ aqlarını qorçalamaq içün Ukraina ve AB arasında koordinatsiyanı quvetleştirüv meselesi baqılacaq, dep qayd etti.
Prezident ofisiniñ malümatına köre, sammitte Ukraina ve AB arasında Avropa qomşulıq aleti çerçivesinde bir sıra maliye añlaşmasınıñ imzalanması planlaştırıla, hususan, Ukraina şarqı, vatandaş cemiyetine qol tutuv ve iklim deñişmeleriniñ aqibetlerini yımşatuv añlaşması.
Avropa yatırım bankı ile añlaşmalarnıñ imzalanması planlaştırıla, o, cemaat binalarınıñ energetik semereligini arttırmaq içün maddiy yardım celp etilüvi ve «Ukrpoştanıñ» modernizatsiyası ve dijitalleşmesinen bağlıdır.
Evelki Ukraina – AB sammiti 2019 senesi iyün ayında Kyivde keçken edi.
