Birleşken Quvetler operatsiyasınıñ ştabı bildirgeni kibi, Donbasstaki Rusiye gibrid quvetleri dekabr 21-inde ateşsizlik rejimini 6 kere bozdı.
Ştabnıñ malümatına köre, boyevikler, Minsk añlaşmalarınen yasaqlanğan 120 millimetr kalibrli mina toplarını qullandı.
Ukraina askerleri arasında yaralanğanlar yoq.
Luğansk vilayetiniñ polisi, dekabr 21-inde saba "LNR" nezaretinde olğan territoriyadan Zolotoye-4 qasabasınıñ atılması aqqında haber ete.
Donbasstaki silâlı çatışma 2014 senesinden itibaren, Rusiye Qırımnı ilhaq etkeninden berli devam ete. Ukraina ve Ğarp Rusiyeni separatistlerge silâlı yardım köstergeninde qabaatlay. Kreml bu qabaatlavlarnı inkâr ete ve Donbassta olsa bile, rusiyeli «göñülliler» bardır dey.
BMTniñ malümatına köre, çatışma esnasında 13 200-den ziyade kişi elâk oldı.
