Rusiye tarafından millionlarnen tonna Ukrayina zahiresiniñ ihracınıñ blok etilmesi arbiy cinayettir. Bunı Avropa Birliginiñ Tış işler yolbaşçısı Josep Borrell dedi.
"Dünyanı diger köşelerinde insanlarnıñ açlıqtan qıynalğan zaman Ukrayinada millionlarnen tonna boğdaynıñ blokadada qalması aqılğa sığmaz. Bu kerçek arbiy cinayettir", - dedi o.
Bugün Avropa Birligi memleketleriniñ TİN yolbaşçıları Ukrayinanıñ Qara deñiz limnlarınıñ Rusiye ordusı tarafından blokadağa alınması sebebinden Ukrayinada qalğan millionlarnen tonna Ukraina zahiresinin ihrac etilüv yollarını muzakere etmek içün toplandılar.
Al-azırda Ukrayinanıñ deñiz limanları blok etilgen. Türkiye limanlarnıñ bloktan çıqarılması içün Ukrayinağa yardım etmege azır olğanını bildirgen edi. Amma Ukrayina akimiyeti limanlarğa keçit yerleri minasızlaştırılsa6 Rusiyeniñ Odesağa ücüm içün deñiz koridorlardan faydalanacağından saqına.
Ukrayina dünyanıñ dörtünci eñ büyük zahire ihracatçısıdır. 2021 senesi o tahminen 45 million tonna aşlıq ekinlerini ihrac etti.
Ukrayina akimiyeti Rusiyeni işğal etilgen topraqlarda ukrayin zahiresini qanunsız elge keçirgeninde qabaatlay. Rusiye akimiyeti ukrayin zahiresini Rusiye ve işğal etilgen Qırımğa çıqarğanını taslıqlay.
Mayısnıñ 24-nde Ukrayin TİN yolbaşçısı Dmıtro Kuleba dünyanı Rusiyeden qırsızlanğan ukrayin zahiresini satın almamağa ve Rusiye cinayetçilerine ortaq olmamağa çağırğan edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
