Avropa Birliginiñ tış siyaseti ve telükesizlik siyasetiniñ yuqarı vekili Jozep Borrel Kyiv vilâyeti Buça şeeriniñ Rusiye ordusından azat etilgeniniñ yılında arbiy cinayetlerde qabaatlı olğanlar cezasını alacaq, dep bildirdi.
«Rusiye arbiyleriniñ Buçada yapqan cenk cinayetleri tapılğanından bir yıl keçti. Deşetler köz ögümde. Avropa Birligi Ukrayınağa bunıñ kibi cinayetlerni tahqiq etip, delil toplamağa yardım ete. Cezası qalmaycaqlar», – dep yazdı Borrel Twitterde martnıñ 31-nde.
2022 senesi martnıñ soñunda Rusiye ordusı Kyiv vilâyetinden, hususan Buçadan ketti. Martnıñ 31-nde şeerge Ukrayına arbiyleri ve Rusiye işğaliniñ aqibetlerini qayd etken çetel neşirleriniñ jurnalistleri kirdi.
Ukrayına Baş prokurorınıñ ofisi bildirgenine köre, 33 kün devam etken işğalde Buça rayonında Rusiye ordusı 9000 cenk cinayetini yaptı: 1400-den çoq vatandaş öldürildi, çoqusı çekiştirip öldürildi. Öldürilgenler arasında – 37 bala. Daa 52 bala yaralandı.
Buça azat etilgeniniñ yılında Ukrayınağa Slovakiya baş naziri Eduard Geger, Sloveniya baş naziri Robert Golob ve Hırvatistan baş naziri Andrey Plenkoviç ve Moldova prezidenti Maya Sandu keldi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
