Büyük Britaniyanıñ baş naziri Boris Johnson COVID-19 koronavirusından tedaviylengen soñ hastahaneden çıqarıldı. Bu aqta baş nazirniñ vekili SkyNews neşirine bildirdi. Onıñ aytqanına köre, ekimlerniñ tevsiyelerine köre Johnson şimdilik işke qaytmaycaq.
Bu aqta Azatlıq Radiosı haber ete.
BBC haber etkenine köre, Britaniya ükümetiniñ yolbaşçısı rezidentsiyasında tedaviylenmege devam etecek.
Johnson, Londra hastahanesinde kösterilgen hızmetke yüksek qıymet kesip, ekimler ayatını qurtardı, dep bildirdi.
Britaniya baş naziriniñ hasta olğanı martnıñ soñunda belli oldı. Johnson, Londradaki Downing Street rezidentsiyasında özüni izolâtsiya etip, memleketni idare etmege devam etti. Amma 10 künden soñ sıcağı köterildi ve onı hastahanege alıp ketkenler.
Bu afta başında baş nazirniñ alı fenalkştı, onı intensiv tedaviy bölügine aldılar. Anda üç kün yattı. Ükümet, ekimler aqcigerlerni suniy avalandırmadı, dep qayd etti.
Johnsonnıñ hastalığından evel, amma bir sıra diger memleketten soñ Britaniya ükümeti umummilliy karantin ilân etti. Cumaaqşamı künü berilgen malümatqa köre, o, eñ az aprelniñ 19-na qadar devam etecek.
Büyük Britaniyada, soñki malümatqa köre, aman-aman 79 biñ COVID-19 hastası qayd etildi. Tahminen 10 biñ hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
