Qırımlı siyasetçi, Qırım Muhtar Cumhuriyeti Yuqarı Şurasınıñ sabıq reisi ve Ukraina Yuqarı Radasınıñ sabıq deputatı Boris Deyç 84 yaşında vefat etti. Bu aqta «Qırım yeudileri regional milliy-medeniy muhtariyeti» cemaat teşkilâtınıñ reisi Anatoliy Gendin ve Qırım kütleviy haber vastaları bildire.
«Argumentı nedeli – Krım» neşiriniñ malümatına köre, Deyç fevralniñ 7-nde saba COVID-19 hastalığı sebebinden alı fenalaşqan soñ Qırımdan Moskva hastahanelerinden birine ketirilip vefat etti. Berilgen malümatqa köre, Deyç aşı olğan ve tekrar aşı yaptırğan edi.
Boris Deyç Ukraina siyasetçisi, V, VI, VII çağırılış Ukraina halq deputatı (2006–2014), bundan evel – Qırım Muhtar Cumhuriyeti Yuqarı Şurasınıñ reisi (2002–2006, 1998 senesinden birinci muavini) edi. Deyç 2001 senesinden berli Regionalr firqasınıñ azası, firqanıñ siyasiy şura azası edi. Ukraina qaramanı unvanına nail oldı (2013).
Qırım işğalinden soñ 2012 senesi Ukraina parlamentine saylanğan Boris Deyç Qırımdaki majoritar okruglarından birinde «Qırım referendumında» ve 2014 senesi Qırımdaki Rusiye saylavlarında rey berdi.
