AB tış siyasetiniñ başı Djzep Borrel, Çin tış işler naziri Van İ ile körüşüv vaqtında, başqa şeylernen beraber, Pekinniñ Rusiyeniñ Ukrayinağa qarşı cenkini desteklegenini muzakere etti.
"Yuqarı vekil Avropa Birligi Rusiyeniñ Ukrayinağa qarşı cenkini ne içün Avropa içün ekzistentsial telüke dep sayğanını añlattı. O, Çinniñ büyük miqdarda eki qullanuvlı mal ve predmetlerniñ ihracatını Rusiyege arbiy tehnika istisalını arttıruvda yardım ete, dep havflı olğanını bildirdi", — dep, qayd etile Avropa tış areketler hızmetiniñ saytında basılğan beyanatta.
Haberge köre, Borrel "Çinden cenkni bitirmege yardım etmek içün Rusiyege olğan tesirini qullanmaqnı" rica etti.
"O, Çinden Ukrayinadaki tınçlıq ceryanını desteklemesini rica etti ve 2024 senesi mayıs ayından başlap Braziliyanen ortaq beyanat bu yönelişte ketmey, dep saya", — dep qoşatılar Avropa hızmetinde.
Bu künleri Ukrayina tış işler naziri Dmıtro Küleba öz Çin meslekdeşi Van İ ile muzakereler keçirdi. Onıñ aytqanına köre, muzakereler adaletli barışıqqa yollar aqqında edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
