Link açıqlığı

Saatnıñ esas haberi

«Boğuluv ve qanlı öksürik» – advokat qırımtatar faali Bekirovnıñ sağlıq vaziyeti aqqında


Edem Bekirov
Edem Bekirov

Silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ sağlıq vaziyeti pek fenalaştı. Yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı. Bu aqta Bekirovnıñ advokatı İslâm Velilâyev Qırım.Aqiqat mühbirine bildirdi. O, müvekkilini bugün Aqmescit SİZOsında ziyaret etti.

«Sağlıq vaziyeti cumadan berli fenalaşa. Añlatqanına köre, boğulmağa başladı. Başta insan nefes alamay, ağıznen nefes almağa tırışa, soñra öksüre ve bu öksürik qanlı ola. Birinci sefer böyle bir şey olğanda o ve kameradaki ekinci insan kamera qapusını pek qaqqan edi. O, SİZOnıñ tibbiy bölüginde olsa da, ekimlerden iç birisi kelmyegen edi. Boğuluv keçken soñ keldiler», – dedi advokat.

Velilâyevniñ aytqanına köre, Bekirov 14 saattan berli aşamay, çünki aşağanda qan şekeri arta. Ekimler insulin berse de, qan şekeri yüksek qala.

Advokat izolâtor yolbaşçısı Sergey Berejnoyğa muracaat etip, müvekkilini baqtırmağa ve acele hastahanege alıp ketmege talap etti.

«Bekirovdan alğan bütün malümatnı SİZOda arizada yazdım. Bugün onı berdim, eñ yaqın vaqıtta cevap bekleymiz. Bu yañı alâmetler meni pek qasevetlendire. İnsannı qurtarmaq kerek, çañ qaqmaq kerek. Böyle alâmetler olsa, ileride qurtarılacaq adam olmaycaq», – dep qoştı Velilâyev.

Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.

Aprelniñ 26-nda Rusiye kontrolindeki Qırım Yuqarı mahkemesi Bekirovnıñ imayesi bergen şikâyet arizasını red etti. Edem Bekirov iyünniñ 12-ne qadar SİZOda qalacaq.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

XS
SM
MD
LG