Ukrayinada insan aqları BMT nezaret missiyası, Rusiyeniñ raketa ve uçucısız ücümleriniñ artması, em de bütün memlekette vatandaşlar arasında elâk olğanlarnıñ sayısı artqanı sebebinden qasevetini bildirdi.
Missiya öz aylıq maruzasında 2024 senesi yanvar ayında Ukrayinada 641 vatandaş öldürildi ya da yaralandı (158 elâk oldı ve 483 yaralandı) dep qayd etti, bu ise 2023 senesi noyabr ayından 37% ziyade. Aynı zamanda, missiyanıñ qayd etkenine köre, aynı müddet içinde zarar körgen balalarnıñ sayısı eki qat arttı: yanvar ayında 40 bala elâk oldı ya da yaralandı, noyabrde ise 18 bala yaralandı.
Birleşken Milletler Teşkilâtı qayd etkenine köre, çoqusı qorantalar cebe yanındaki yerlerden tahliye etilgeni içün, öldürilgen ya da yaralanğan balalarnıñ sayısı sıq-sıq arta.
Rusiyeniñ Ukrayinağa büyük cenkiniñ aman-aman eki yılı devamında BMT missiyası 10 000-den ziyade vatandaşnıñ elâk olğanını ve 20 000-den ziyade yaralanğanını qayd etti.
''Aile ve balalarnıñ yaralanması ve ölümi, büyük şeerlerde nişanlarğa qarşı küçlü patlayıcı silânıñ qullanılmasınıñ tahmin etilgen ve facialı aqibetidir'', - monitoring missiyasınıñ yolbaşçısı Danielle Bell bildirdi.
Ukrayina arbiy-deñiz quvetleriniñ ava quvetleriniñ malümatına köre, Rusiye fevralniñ 7-nde Ukrayina territoriyasına bir qaç kere ücüm etti, 64 dron, qanatlı, ballistik ve zenit raketası qullanıldı. Ukrayina arbiyleri 29 raketa ve 15 "Şahed" urıp tüşürdi.
Moskva, isbat ve şaatlıqlarğa baqmadan, tam cenk başlağanından berli Ukrayinada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
