BMT-nıñ İnsan aqları Yuqarı komissarı ofisiniñ malümatına köre, Rusiyeniñ memleketniñ territoriyayaına keniş mıqyaslı istilâsı zamanı Ukrayinada 8189 vatandaş elâk olğanı ya da yaralanğanı qayd etildi: olarnıñ arasında 3838 elâk oldı ve 4351 yaralandı.
BMT-niñ İnsan aqları Yuqarı komissarı ofisiniñ bildirgeni kibi, bu raqamlar fevralniñ 24-den mayısnıñ 19-na qadar qayd etilgen.
Aynı zamanda, BMT-da kerçek raqam daa çoq olğanını tüşüneler. Çünki arbiy areketler devam etken bir çoq yerden malümat keç kele. Bular Mariupol (Donetsk vilâyeti), İzüm (Harkiv vilâyeti) ve Popasna (Lugansk vilâyeti).
Mayısnıñ 12-nde Birkeşken Milletler Teşkilâtınıñ qaçaqlar meseleleri agentligi, Rusiyeniñ Ukrayinağa qarşı keniş mıqyaslı istilâsı başlanğandan berli memleketni 6 million adam terke etkenini bildire.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
