Qarar içün 93 "ebet" ve 18 "qarşı" rey berildi, 65 — bitaraf qaldı. Bu, 140-tan ziyade memleketniñ Rusiye istilâsını takbih etken ve Ukrayinanıñ dört regionınıñ ilhaqını lâğu etilmesini talap etken evelki qararlardan azdır.
Oña qarşı Belarus, Burikina-Faso, Burundi, Eritreya, Ekvatorial Gvineya, Mali, Marşall adaları, Nikaragua, Niger, Palau ve ABD rey berdi.
Avropa tarafından desteklengen Ukrayina qararı, cenkni tez vaqıtta toqtatmağa çağırğan, amma 2022 senesi fevralniñ 24-nde Rusiyeniñ Ukrayinağa istilâsına dair bir şey aytmağan ABD-niñ qarşı teklifine rey berüvden evel qabul etildi.
Bundan evel matbuat vastaları bildirdi ki, Birleşken Devletler Birleşken Milletler Teşkilâtı Baş Assambleyasınıñ Ukrayinağa Rusiye istilâsınıñ üçünci yıllığı munasebeti ile öz qarar leyhasını teklif etti. Vaşington metni "zıddiyetni tez vaqıtta toqtatmağa" çağıra, Ukrayina topraq bütünligi aqqında aytmay ve Moskvanı tenqit etmey.
Onıñ yerine 65 sözden ibaret metin "Rusiye-Ukrayina zıddiyeti vaqtında insanlarnıñ facialı ölümi sebebinden matem" ile başlana.
Bundan soñra, Birleşken Milletler Teşkilâtınıñ maqsadı halqara barışıq ve telükesizlikniñ saqlanuvı olğanını tasdıqlay.
Bundan evel bazı kütleviy haber vastaları, Birleşken Devletler Rusiyeniñ Ukrayinağa qarşı cenkiniñ üçünci yıllığına BM qararınıñ müellifi olmaqnı red ete, dep bildirgen edi.
BMT qararınıñ leyhası 2025 senesi fevralniñ 24-ne, cenkniñ başlanmasınıñ üçünci yıllığına azırlandı. Bu kibi qararlar teşkilât tarafından eki yıl evelsi çıqarılğan edi, ve ABD er vaqıt imzalağanlar arasında edi. Şimdi qararnıñ müellifleri arasında Büyük Britaniya, Frenkistan, Almaniya, Kanada, İsviçre, Poloniya, Litvaniya, Letoniya ve Estoniya bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
