Ukraina prezidentiniñ QMC daimiy temsilcisi Anton Körineviç martnıñ 27-nde, BMT Baş Assambleyasınıñ tarafından Ukrainanıñ topraq bütünligini desteklegen qararnıñ qabul etilmesiniñ yedinci yıldönüminde bu vesiqağa «müim qararname» dedi.
«QMC ve Aqyar şeeri ve 2014 senesi meseleleri boyunca halqara seviyesinde qabul yotilgen müim qararname», – dep yazdı o Facebook saifesinde.
Он также прокомментировал принятие украинской стратегии деоккупации Крыма.
Bundan ğayrı o, Qırım deokkupatsiya strategiyasını da tefsir etti.
Onıñ sözlerine köre, bu kibi müim vesiqalar em halqara seviyede, em memleket içinde alınmalı.
«Çünki memleket içindeki – bu devletniñ qabiliyeti ve körmesi. Bunıñ içün siyasiy irade olmaq ve çalışmaq kerek», – dep saya Körineviç.
Rusiye Donbasta ve işğal etilgen Qırımdaki vaziyetniñ stabilsizleştirüvini toqtatmalı. Bunıñ aqqında BMT Baş Assambleyasınıñ tarafından Ukrainanıñ topraq bütünligini desteklegen qararnıñ qabul etilmesiniñ yedinci yıldönümi ile bağlı BMT aza devletleriniñ ortaq beyanatında yazıla.
Dekabrniñ 16-da, BMT Baş Assambleyası işğal etilgen Qırımda insan aqları vaziyeti aqqında yañartılğan ve quvetleştirilgen qararnı qabul etti. Qararğa 64 devlet qol tuttı, 23 ise qarşı çıqtı.
Ukraina prezidenti Volodımır Zelenskıy Qırımnı işğalden qurtaruv ve reintegratsiya strategiyasını işke tüşürdi. Bu aqta Ukraina devleti yolbaşçısınıñ matbuat hızmeti martnıñ 24-nde bildire.
Ukraina milliy telükesizlik ve mudafaa şurasınıñ kâtibi Oleksiy Danilov martnıñ 11-nde «Qırımnı işğalden qurtaruv meselesinde nasıl areket etecegini tam belgilegen Rusiyeniñ Qırım işğali başlağanından berli ilk temel vesiqası» azırlanıla, dep ilân etti. Prezident Zelenskıy, «işğal şaraitlerini kim ve nasıl yaratqanını» bilmek de müim ola, dep bildirdi..
Rusiye Ukraina Milliy telükesizlik ve mudafaa şurası tarafından qabul etilgen Qırımnı işğalden qurtaruv strategiyasını ve «Qırım platforması» teşebbüsini «telüke» ve «Rusiye Federatsiyasınıñ topraq bütünligine qast etüv» olaraq saya, dep bildirdi martnıñ 15-nde Rusiye Tış işler nazirliginiñ spikeri Mariya Zaharova.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
