BMT insan aqları komiteti ilhaq etilgen Qırım sakinlerine Rusiye vatandaşlığını mecbur etüv milliy mensüplik boyunca ayırım olğanını ve insan aqlarını boza, dep tanıdı. Bu aqta Ukrayina parlamentiniñ insan aqları vekâletlisi Dmıtro Lubinets bildirdi.
"Komitet, Rusiye Federatsiyası Ukrayina vatandaşlarını Qırım yarımadasından öz toprağına ceza çekmek içün qanunsız sürgün etkenini de qayd etti, bu da insan aqlarınıñ bozuluvıdır", – dep qayd etti o.
Lubinets qayd etti ki, BMT komiteti üç ukrayin vatandaşınıñ şahsiy şikâyetlerini baqtı. Olardan biri yarımada zapt etilmezden evel tutuldı ve Rusiye qanunlarına köre mahküm etildi. Qalğan ekisi Qırım ilhaqından evel mahküm etilgen edi, soñra Rusiye Ceza kodeksine esaslanıp ükümleri deñiştirildi. Qayd etilgenine köre, üçüne de Rusiye vatandaşlığını almaq zorladılar ve Rusiyede ceza çekmek içün yolladılar.
BMT komiteti, Rusiye Federatsiyası, iştirakçisi olğan Halqara grajdan ve siyasiy aqlar paktı boyunca insan aqlarını bozğanını tanıdı.
Ombudsmenniñ aytqanına köre, komitetniñ fikrince, şahısnıñ vatandaşlığı onıñ kimliginiñ müim bir qısmı ola ve şahsiy ayatına öz başına ya da qanunsız kirişüvden qorçalav, oña çetel vatandaşlığınıñ zorbalıqnen berilmesinden qorçalavnı da qaplap ala.
"Birleşken Milletler Teşkilâtınıñ İnsan aqları komitetiniñ hulâsasını qabartmayıp tarihiy dep adlandırmaq mümkün. Avropa insan aqları mahkemesiniñ bu kibi Qırım davaları boyunca ilerideki qararları içün ciddiy temel teşkil etile. Bu hulâsa halqara arenada bir örnek ola ve Rusiye Federatsiyasınıñ bütün bozuluvları içün ileride mesüliyetke çekilmesine sebep ola", - dep qayd etti Lubinets.
Rusiye tarafından ilân etilgen ukrayin topraqlarınıñ ilhaqı Ukrayina ve dünyanıñ çoqusı memleketleri tarafından tanılmadı. Rusiye tarafından zapt etilgen topraqlarnıñ bir qısmı Ukrayina nezareti altında buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
