2014 senesi baarden başlap, 2019 senesi noyabr ayına qadar Donbassta 3 biñ 330-dan çoq silâsız adam elâk oldı, dep bildire Birleşken Milletler Teşkilâtınıñ yañartılğan malümatında, haber ete Nastoyaşçeye Vremâ.
BMT sayğanına köre, 9 biñge qadar sakin atuvlar vaqtında yaralandı, 1 million 300 biñ adam ise içki icretçi oldı.
Bundan ğayrı teşkilât, çatışma neticesinde "esas hızmetlerge yolnı qapatqan" 427 kilometrlik "toqunma yolağı" peyda oldı, dep qayd ete. BMT-nıñ malümatına köre, 3,5 million adam şimdilik yardımğa muhtac.
Oktâbr soñunda (Donbass çatışmasını tertiplev "Steinmeier formulası" çerçivesinde) Zolotoye qasabasında sıñırladıruv yolağından Ukraina orduları ve rusiyeli separatistlerniñ orduları çekilip başladı. Ukraina TİN-niñ başı Vadim Pristaykonıñ aytqanına köre, protsessni bitirmek içün bir ayğa qadar vaqıt kerek. Atuvlar aqqında bildirmeler olğanına baqmadan, ordularnı uzaqlaştıralar.
