BMT Baş Assambleyası Rusiyeniñ İnsan aqları Şurasında azalığınıñ toqtatılması aqqında qararğa qoltuttı. Bu qararğa 93 memleket qoltuttı, 24 qarşı çıqtı, 58 bitaraf qaldı.
ABD ve bir sıra diger memleket bunıñ aqqında BMT-na muracaat etti. Bu, Ukrayina Rusiye ordusını Kıyiv vilâyetinde yüzlerce tınç sakinni öldürmekte qabaatlağan soñ oldı.
Hatırlatamız, Rusiye artıq ekinci yıl BMT-niñ İnsan Aqları Şurasınıñ azasıdır. Şuranıñ umumiy azalıq müddeti üç yıldır.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
