BMT Baş Assambleyası Qırımnıñ arbiyleştirilmesine qarşı quvetleştirilgen qararnı qabul etti. Bunıñ aqqında Twitter-de Ukraina TİN başı Dmıtro Kuleba yazdı.
«Qararda «Qırım platforması»na müim destek berile, Rusiye yarımadağa silâ ve ordunıñ köçürmesini, Qara ve Azaq deñizlerinde gemiler qatnavı serbestliginiñ bozmasını toqtatmağa çağırıla. Men qararnı desteklegn bütün BMT-nıñ aza devletlerine minnetdarım. O, «Qırım platforması»na ve onıñ maqsatlarına halqara destekni birleştire, Qırımnıñ artqan arbiyleştirilmesine qarşılıq köstere, Rusiyeniñ sıñırılarımızda ve Qırımda artqan arbiy mevcutlığı üzerinde toqtatqan signallar yollay», – dep yazdı Kuleba.
Ukraina prezidenti Volodımır Zelenskıy BMT Baş Assambleyasınıñ komiteti tarafından Qırımda insan aqları vaziyetine dair qarar leyhasınıñ ruhset etilmesini alğışladı ve "Qırım platforması"nıñ da vesiqanıñ metininde olmasını qayd etti.
Keçenlerde BMT, Rusiyeni qanunsız apis etilgen Ukraina vatandaşlarınıñ, şu cümleden Qırım.Aqiqat frilanseri Vladislav Yesipenko, Emir-Üsein Kuku, Galina Dovgopolaya, Server Mustafayev, Nariman Celâl ve digerlerini azat etmege çağırğan qarar leyhasını destekledi.
Ukraina prezidenti Volodımır Zelenskıy New Yorktaki BM Baş Assambleyasınıñ 76-ncı sessiyasında çıqışta bulunıp, işğal etilgen Qırımdaki vaziyet aqqında tarif etti.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
