51 memleketniñ diplomatı devletleri adından Rusiye-Ukrayina cenkinen bağlı beyannameni imzaladı, onı sentâbrniñ 23-nde BM Telükesizlik Şurasınıñ toplaşuvı ögünde aydınlattılar.
Vesiqada "Rusiye istilâ cenkine oğramağa devam etken" Ukrayina ile birdemlik qayd etile.
"2025 senesi mart ayından berli Ukrayina ateşniñ tam, acele ve müddetsiz toqtatıluvına razı oldı. Rusiyeni de aynı şekilde yapmağa çağıramız, bu barışıqqa ketirgen manalı diplomatiya ve muzakerelerge doğru kerekli bir adım… Ukrayina barışıqqa ıntıla. Biz barışıq isteymiz. Rusiye istilâsını toqtatıp, ateş toqtatıluvını qabul etmeli ve halqara uquqqa uyğun umumiy, adaletli ve sağlam barışıq içün muzakere keçirmeli", – dep aytıla beyannamede.
Diplomatlar Rusiyeni "qanunsız tutulğan, zornen alıp ketirilgen ya da sürgün etilgen Ukrayina vatandaşlarını, balalarnı acele, telükesiz ve şartsız bir şekilde qaytarmasını ve bütün cenk esirlerini ve zornen tutulğanlarnı qaytarmasını" temin etmege çağırdı.
Vesiqanı Avropa birligi vekâletli temsilcileri, aza-devletleriniñ vekilleri, Kanada, İsviçre, Gürcistan, Moldova, Avstraliya, Yañı Zelandiya, Panama, Koreya, Büyük Britaniya ve diger memleketlerniñ vekilleri imzaladı.
BM Telükesizlik Şurası sentâbrniñ 23-nde Rusiye devam ettirgen cenk vaziyetinde Ukrayinağa bağışlanğan bir toplaşuv keçire.