BM Ukraina insan aqları Monitoring missiyasınıñ reisi Matilda Bogner sentâbrniñ 23-nde Kyivde taqdim etken yañı maruzasında Aqmescitte altı yılğa ğıyabiy şekilde üküm etilgen Qırımtatar Milliy Meclisiniñ reisi Refat Çubarovnıñ davasında halqara standartlar bozuldı, dep qayd etti.
«Qırımda bugün esas Ukrainada yaşağan Qırımtatar Milliy Meclisiniñ reisi Refat Çubarovnıñ davasında adaletli mahkeme aqları kene bozuldı. O, Qırımdaki mahkeme tarafından 2014 senesi fevralniñ 26-nda Qırım parlamenti ögünde miting vaqtında qalabalıqlarnı teşkil etkeninde qabaatlanıp, ğıyabiy şekilde 6 yılğa üküm etildi, bu halqara standartlarnı boza», – dep qayd etti Bogner.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
İyünniñ 1-nde Aqmescitte Rusiye kontrolindeki Qırım Yuqarı mahkemesi Qırımtatar Milliy Meclisiniñ reisi Refat Çubarovğa çıqarğan ükmü Qırım Muhtar Cumhuriyeti ve Aqyar Prokuraturası tarafından «qanun ve cenk adetleriniñ bozuluvı» olaraq tasnif etile. Bu aqta nezaret müessisesiniñ matbuat hızmeti bildirdi.
Aqmescitteki Rusiye kontrolindeki Qırım Yuqarı mahkemesi iyünniñ 1-nde Qırımtatar Milliy Meclisiniñ reisi Refat Çubarovnı 2014 senesi fevralniñ 26-nda Qırım parlamentiniñ binası ögünde «qalabalıqlarnı teşkil etkeninde» qabaatlap, ğıyabiy üküm çıqardı. Mahkeme Çubarovnı altı yıl apis cezasına ve 200 biñ rublege üküm etti.
Çubarov Qırım.Aqiqatqa tefsir etip, çıqarılğan ükümni «uquq ceetinden boş» dep adlandırdı.
Qırım Muhtar Cumhuriyeti ve Aqyar prokuraturası Rusiye tahqiqatçılarınıñ Çubarovğa qarşı açqan cinaiy dava sebebinden tahqiqat başlatqan edi.
