BM insan aqları monitoring missiyası Rusiyeni Qırımtatar Milliy Meclisi yasağını lâğu etmesine çağırdı. Bu aqta sentâbrniñ 29-nda BM missiyasınıñ Facebook muracaatında aytıla.
«3 yıl evelsi, 2016 senesi sentâbrniñ 29-nda, Rusiye Federatsiyasınıñ Yuqarı mahkemesi Qırımnıñ Yuqarı mahkemesi çıqarğan Meclis yasağı qararını deñiştirmedi. Neticede, Meclis, qırımtatarlarnıñ temsiliy organı, bugünge qadar vazifesini yapıp olamay. BM Halqara mahkemesiniñ qararına baqmadan, vaziyet deñişmey… Rusiye Federatsiyasını BM mahkemesiniñ qararını yerine ketirip, Meclis faaliyetiniñ yasağını lâğu etmege çağıramız», – dep aytıla teşkilâtnıñ beyanatında.
2017 senesi mahkeme Rusiye qırımtatarlarnıñ temsiliy organları, hususan Meclisniñ sıñırlamasından vazgeçmek kerek, dep qarar çıqardı.
Varşavadaki OSCE toplaşuvında Qırımtatar Milliy Meclisiniñ azası Eskender Bariyev Rusiyeni BM Halqara mahkemesiniñ Qırımda Meclis faaliyetiniñ yasağını lâğu etmek qararını yerine ketirmege mecbur etecek plannı teklif etti.
Qırımtatar Milliy Meclisiniñ reisi Refat Çubarov OSCE toplaşuvında Rusiye akimiyetini ve yarımada teşkilâtlarını temsil etecek işğal etilgen Qırımdan iştirakçiler qayd etildi, dep bildirdi.
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmekte. Qırımtatar Milliy Meclisi ve Qurultayı qırımtatarlarnıñ temsiliy organları olaraq tanıldı.
Er yıl avgustnıñ 9-nda dünya tamır halqlar künü qayd etile. Onı BM Baş Assambleyası 1994 senesi tasdıqladı.
