Ukrainadaki BM insan aqları monitoring missiyası Qırım sakinleriniñ Ukraina akimiyeti tarafından taqip etilgeni aqqında bir şey bilmey. Malüm olğanı kibi, Rusiye ombudsmeni Tatyana Moskalkova BM insan aqları komissarı Mişel Baçelet ile körüşip böyle taqipler aqqında aytqan edi. Bu aqta Ukrainadaki BM insan aqları monitoring missiyasınıñ bağ mütehassısı İrina Yakovleva Qırım.Aqiqatqa tarif etti.
«Em Qırımda, em umumen Ukrainada insan aqları vaziyetine dair açıq maruzalar azırlaymız. Anda BM insan aqları Yuqarı komissarı idaresiniñ usullarına ve halqara standartlarğa uyğun bir şekilde teşkerilgen malümat kirsetile. Al-azırda Moskalkovanıñ bergen malümatı maruzalarımızda aks etilmegen», – dep añlattı Yakovleva.
Onıñ bildirgenine köre, Mişel Baçelet Tatyana Moskalkova ile BM insan aqları Şurasınıñ toplaşuvı çerçivesinde körüşti.
«Keçken afta Jenevada BM insan aqları Şurasınıñ toplaşuvı keçirilgen edi. Bu toplaşuvnen beraber BM insan aqları Yuqarı komissarı Mişel Baçelet çeşit memleketlerniñ devlet organlarınıñ vekillerinen körüşe. Moskalkovanıñ teşebbüsinen böyle körüşüv protokolğa köre keçirildi, komissar dünyanıñ er angi memleket temsilcisinen aynı şekilde körüşe», – dedi o.
Ukraina Yuqarı Şurasınıñ insan aqları vekâletlisi Lüdmila Denisova Moskalkovağa muracaat etip, Ukrainada «avğa oğrağan» insanlarnıñ soyadları ile cedvelni aydınlatmağa rica etti.
Bundan evel martnıñ 5-nde Tatyana Moskalkova Mişel Baçelet ile körüşip, ondan Ukraina akimiyeti tarafından taqip etilgen Qırım sakinleriniñ aqlarını qorçalamağa yardım etmesini rica etti. Onıñ aytqanına köre, Kyiv Qırım sakinlerini «avlay».
Qırım işğalinden soñ esas Ukrainada devlet hainliginde ve topraq bütünligine qast etüvden şübheli sayılğan bir sıra Qırım siyasetçisi ve memurı yaqalanğan edi. Olarnıñ arasında – Qırımnıñ sabıq sağlıq naziri Petr Mihalçevskiy, Qırımnıñ Rusiye sport naziriniñ sabıq muavini Faruh Kamalov, Kezlev şeer şurasınıñ deputatı Sergey Osminin, «Volonterı Pobedı» Rusiye cemaat areketiniñ bölük reberi, Vladimir Putinniñ saylavlardaki vekâletli temsilcisi Yelena Odnovol, Qırım Muhtar Cumhuriyeti Yuqarı şurasınıñ sabıq deputatı Vasiliy Ganış. Devlet hainliginde ve askerlikten qaçuvda qabaatlanğan Qırımdaki sabıq ukrain arbiyleri Aleksandr Baranov ve Maksim Odintsov yaqalanğan ve mahküm etilgen edi. Rusiye akimiyeti Baranov ve Odintsovnıñ yaqalavını «asker hırsızlavı» olaraq tanıy.
