Ukraina prezidenti Petro Poroşenko emin ki, Birleşken Milletler işğal etilgen Qırım qararını çıqaracaq. Bunı o, «112 Ukraina» kanalı yayınlağan Harkivdeki «Yañartuv. Yatırım. Harkiv teşebbüsleri» 10-uncı halqara iqtisadiyat forumında ayttı.
«BM Baş assambleyasında iştirak etkenim ve dünya liderleri ile körüşkenimniñ neticesi devletimiz ile birdemlik içün dünyada birlik pekitilmesi aqqında añlaşma oldı. Birleşken Milletlerniñ Qırım rezolütsiyası qabul etilecek, Rusiye Ukraina toprağını qanunsız şekilde işğal etken devlet dep adlandırılacaq», – dep qayd etti o.
Poroşenkonıñ qayd etkenine köre, BM Baş assambleyası ziyaretiniñ esas maqsadı «BMniñ Qırım ve Donbassnı işğalden qurtarma esnasına faal celp etilmesi» edi.
«Becerdik. Birleşken Milletlerde Rusiyeniñ halqara tecritte olğanı ifade etildi», – dep qayd etti prezident.
Jenevadaki BM insan aqları şurasınıñ 39-ıncı sessiyasında Rusiyeni Qırımda insan aqlarına riayet etmege, «işğalci devlet olaraq halqara uquqqa köre vazifelerini yapmağa», em de halqara közeticilerge işğal altındaki Qırımğa kirme imkânını bermege çağırdılar.
Qırımtatar Milliy Meclisiniñ reisi Refat Çubarov Ukraina eyyetiniñ erkânında olıp, Jenevadaki BM insan aqları şurasınıñ 39-ıncı sessiyasında çıqışta bulundı ve işğal etilgen Qırımda insan aqlarınıñ vaziyeti aqqında malümat berdi.
2017 senesi Ukraina BM Halqara mahkemesine Rusiyege qarşı dava açtırdı. Böylece, Ukrainada terrorizmge qoltutqanı ve maliye etkeni, em de Ukrainağa qarşı istilâiy adımlar çerçivesinde ırqiy ayırım yapqanı içün mesülietke çekilmesini talap etti. Ukraina, BM Halqara mahkemesine muracaat etip, vaziyetni köz ögüne alıp, kerekli tedbirler almağa rica etti. 2017 senesi aprelniñ 19-nda mahkeme Ukrainanıñ talaplarına köre Rusiyege qarşı vaqtınca tedbir almağa qarar berdi.
Rusiye Qırımnı işğal etken soñ FSB mustaqil jurnalist, cemaat faalleri, qırımtatar faalleri, muhalifet ve Ukrainağa qoltutqan faallerge ve diniy azlıqlarnıñ vekilleri yaşağan evlerde tintüvler keçire, olarnı sorğuğa çeke ve tutıp ala. Aq qorçalayıcılar, Rusiye uquk qoruyıcılarınıñ bu yapqanları siyasetnen bağlı olğanını bildire.
