Rusiye, işğal etilgen Qırım sakinlerini Silâlı quvetlerine aluv kampaniyasını devam ettire. BM insan aqları monitoring missiyası, bu işğalci devlet tarafından mecburiyetleriniñ bozuluvı ola, dep hatırlata.
«Rusiye mahkeme sicilinde askerlik yapmağa istemegenlerge qarşı 2019 senesi açılğan 25 tahqiqat mevcut. Qabaatlanğanlar ABD dolları olaraq 243-ten 810-ğa qadar para cezasını aldı», – dep aytıla missiyanıñ haberinde.
BM missiyasınıñ malümatına köre, Qırımda askerlik yapmağa istemegen insanğa qarşı açılğan ilk dava aqqında 2017 senesi belli olğan edi.
«O vaqıttan berli askerlik yapmağanlarğa qarşı eñ az 68 cinaiy tahqiqatnı qayd etti, olarnıñ eñ az 32 qabaatlayıcı ükmü derc etilgen edi», – dep aytıla haberde.
Missiyanıñ hatırlatqanına köre, Rusiye «Silâlı quvetlerine mecburiy celp etüvni toqtatıp, askerlik yapmağan Qırım sakinleriniñ cinaiy taqibini bitirmeli».
«Halqara gumanitar uquqına köre, işğal başında Qırımda yaşağanlar imaye altında olğanlar olaraq tanıla», – dep qayd etti missiya.
Human Rights Watch halqara aq qorçalayıcı teşkilâtı, 2019 senesi baarde arbiy hızmetke celp etilgen qırımlılarnıñ tahminen 85%-ı qomşu Rusiyeniñ bazalarına yollanıldı.
Amerika Birleşken Devletleri, Rusiye onıñ ordusında askerlik yapmağa istemegen qırımlılarğa qarşı cinaiy dava açqanından qasevetlengenini bildirdi.
Kyiv, Rusiyeden işğal etilgen Qırım sakinleriniñ silâlı quvetlerine celp etilüvini toqtatmasını talap ete. Qırım Muhtar Cumhuriyetiniñ prokuraturası, Rusiye ordusında askerlik yapmaq içün celpname alğan qırımlılardan telefon ya da elektron poçta vastasınen muracaat etmelerini rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı. OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
