Gaagadaki BM Halqara mahkemesinde sentâbrniñ 18-nden 27-ne qadar Ukrayınanıñ Rusiyege qarşı davasınıñ ilk diñlevleri keçirilecek. Dava Rusiyeniñ büyük istilâsı sebebinden Genotsid cinayetleriniñ ögüni aluv halqara şartnamesiniñ bozuluvı ve ceza berilüvinen bağlıdır.
Ukrayına 2022 senesi fevralniñ 27-nde dava açtırdı. Bundan evel mahkeme davağa 32 memleket qoşula bile, dep qarar çıqardı – aman-aman bütün Avropa devletleri, Kanada, Avstraliya ve Yañı Zelandiya. Amerika Birleşken Devletlerine mahkeme formal bir sebepten izin bermedi.
İlk diñlevlerde Rusiye tarafı davanıñ BM Halqara mahkemesinde baqılması uyğun olmağanını tasdıqlamağa tırışacaqtır. «Kyivniñ iddiaları BM Nizamnamesine köre mahsus arbiy operatsiyanıñ qanunğa uyğun olmağanı ve «DNR» ve «LNR» statuslarınıñ şikâyetlerinen bağlı. Bu meselelerge işbu şartnameniñ bir alâqası yoq», – dep bildirgen edi Rusiye Tış işler nazirligi.
Ukrayına tarafı Rusiyeniñ Ukrayınağa qarşı yapqan areketleriniñ genotsid alâmetleri bar, dep tüşüne. Delillerden biri balalarnıñ Ukrayınadan çıqarıluvı ola.
Sentâbrniñ başında BM Ukrayınadaki cinayetlerniñ tahqiq etilüvi komissiyasınıñ yolbaşçısı Erik Mose bildirgenine köre, Birleşken Milletlerniñ «Genotsid cinayetleriniñ ögüni aluv ve ceza berüv şartnamesiniñ uquqiy talaplarına uyğun yeterli delilleri şimdilik yoq».
BM mahkemesi dava mahkemege baqıla bilecegini qabul etse, asıl diñlevler kelecek sene başlay ve yıllarnen devam ete bile.
BM Halqara mahkemesi – Birleşken Milletlerniñ esas mahkeme organıdır. O, Gaagadaki (Felemenk) Barışıq sarayında yerleşe ve devletler arasındaki uquqiy davalarnı halqara uquqqa köre baqa. Rusiye onıñ yurisdiktsiyasını tanıy, amma bazı davalarda red ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
