BM Halqara mahkemesiniñ Irqiy ayırım şekilleriniñ yoq etilüvine dair halqara şartnamesini bozuv qararından soñ işğal etilgen Qırımda qırımtatarlarnıñ taqip etilüvi quvetleşti, dep bildirdi Qırımtatar resurs merkeziniñ uquqçısı Lüdmila Korotkih «Suspilne» yayınlayıcısına.
«BM Halqara mahkemesiniñ qararından soñ yerli Meclis vekillerinen reydler oldı, bu insanlarda tintüvler keçirildi, subetler keçirildi. FSB vekillerinden «ne içün bizge keldiñiz?» dep sorasalar, cevap bir edi: «Meclis azaları olasıñız, taqiptesiñiz». Sizni taqip etemiz», – dep qoştı o.
Ekspertniñ qayd etkenine köre, soñki yılları işğalci akimiyetniñ Qırımda qırımtatar halqına qarşı qullanğan esas alet «islâm terrorizmi» içün taqip ola, çünki qırımtatar halqınıñ ekseriyeti islâm dinini küte.
«Qırım işğaliniñ 10 yılı devamında 331 insan cinaiy davalar boyunca siyasiy taqipke oğradı, 217 kişi tamır qırımtatar halqınıñ vekilleri ola», – dep qayd etti o.
Yanvarniñ soñunda BM Halqara mahkemesi Rusiyeniñ Qırımda ukrayınlerniñ Qırımda ana tilinde tasil almaq aqqını bozğanını tanıdı. Diger qabaatlavlar, Qırımda etnik azlıqlarnıñ taqip etilüvine kelgende mahkeme qırımtatarlarnıñ taqip etilüvi siyasiy sebeplerden degil de, etnik alâmetlerge köre yapıla dep aytıp olamay, şunıñ içün Kyivniñ bu iddiaları red etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
