Birleşken Milletler koronavirus yuqunçı pandemiyası insan aqları buhranına «tez çevirile», dep tenbilemekte, çünki ükümetler sıñırlav tedbirlerini ilân ete ve tarqaluvnıñ içtimaiy ve iqtisadiy aqibetlerini qolaylaştırmaq içün yüzlernen milliard dollar toplamağa tırışa, dep haber ete Azatlıq Radiosı.
BM baş kâtibi António Guterresniñ bildirgenine köre, COVID-19 ile küreşmek içün devlet hızmetlerine «irişmege keder etken qurulış maniaları» bar.
2019 senesiniñ soñunda pandemiya peyda olğan Qıtay sekiz künden berli COVID-19 hastalığından ölgenler aqqında bildirmey. Dekabr ayında koronavirus ilk sefer Uhan şeerinde qayd etilgen soñ, tenqitçiler Qıtaynı malümatnı gizlegeninde qabaatladı.
Aprelniñ 23-nde aqşam dünyada 2 mln 665 biñden çoq koronavirus hastası qayd etildi, 186 biñden çoq insan vefat etti, dep bildire Johns Hopkins Universiteti. Eñ çoq hasta ABDde qayd etildi, anda Kongress yuqunç ve onıñ aqibetlerini yeñmek içün 500 mlrd dollar yardım paketini tasdıqladı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
