Birleşken Milletlerniñ Havfsızlıq şurasında martnıñ 15-nde işğal etilgen Qırımdaki vaziyetke bağışlanğan mahsus toplaşuv olacaq. Bu aqta Ukraina Tış işler nazirliginiñ muavini Serğiy Kıslıtsâ haber ete, dep bildire Azatlıq Radiosı.
Toplaşuv Kyiv saatına köre saat 16:00-da başlanacaq.
Kıslıtsânıñ aytqanına köre, diplomatlardan ğayrı toplaşuvda qırımtatar halqınıñ liderleri ve cenk esiri olğan deñizciniñ qızı Olga Oprısko iştirak etecekler.
«Resmiy ukrain eyyetinden ğayrı, toplaşuvda Qırımtatar Milliy Meclisiniñ reis muavini Ahtem Çiygoz, «Qırım eviniñ» programm müdiri Alim Aliyev, Dünya qırımtatarlar kongressiniñ azası Ayla Bakallı iştirak etecekler», – dep qayd etti diplomat.
BM Havfsızlıq şurasınıñ saytındaki kün tertibinde işbu toplaşuv aqqında malümat yoq.
Halqara toplulıq Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
