Link açıqlığı

Saatnıñ esas haberi

BM Baş kâtibi Putin ve Lavrovnen körüşecek


Vladimir Putin ve Antonio Guterres, arhiv fotoresimi
Vladimir Putin ve Antonio Guterres, arhiv fotoresimi

Rusiye prezidenti Vladimir Putin Moskvada BM Baş kâtibi Antonio Guterresnen körüşecek. Bu aqta Rusiye prezidentiniñ matbuat kâtibi Dmitriy Peskov bildirdi.

Guterres salı künü, aprelniñ 26-nda, Rusiye Tış işler naziri Sergey Lavrovnen muzakere keçirecek. O künü Putinnen de körüşmesi kerek. Daa evel berilgen malümatqa köre, BM Baş kâtibi Rusiye prezidentinden onı Moskvada qabul etmesini, Ukraina prezidenti Volodımır Zelenskıyden ise onı Kyivde qabul etmesini rica etti. Guterres eki devletniñ yolbaşçılarınen cenkniñ barışıq şeklinde toqtatılmasını ve çoq taraflı munasebetlerniñ kelecegini muzakere etmege istey.

BM Baş kâtibi Rusiye Ukrainağa büyük ücüm etken soñ Putinnen körüşecek ekinci büyük ğarp siyasetçisi olacaq. Aprelniñ 11-nde Moskvanı Avstriya kantsleri Karl Nehammer ziyaret etti. O, Rusiye prezidentinen muzakere keçirdi. Kantsler körüşüvni «pek sert», «pek açıq» ve «pek samimiy» dep adlandırdı. «Bu dostane bir ziyaret degil», – dep qayd etti Nehammer, Moskva ziyareti onıñ içün «mecburiyet» olğanını qoşıp.

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG