BM Baş Assambleyasınıñ 75-inci sessiyasınıñ kün tertibine «Vaqtınca işğal etilgen Ukraina topraqlarındaki vaziyet» kirsetildi. Bu aqta Ukrainanıñ BM daimiy temsilciligi bildirdi.
«New Yorktan güzel haberler! Ortaqlarımızğa BM BA 75-inci sessiyası kün tertibiniñ leyhasına vaqtınca işğal etilgen topraqlardaki – Qırım ve Donbastaki – vaziyetni kirsetkenleri içün minnetdarmız. «Anda yoqmız» ve «Qırımbizim» laflarına berecek cevabımız bar», – dep yazdı Ukraina Tış işler naziriniñ birinci muavini Emine Ceppar Twitterde.
Ukrainanıñ BM temsilciligi Qırım ve Donbas meselesiniñ BM Baş Assambleyasınıñ kün tertibine kirsetilmesine qarşı çıqqan memleketler cedvelini aydınlattı.
Olarnıñ arasında: Ermenistan, Beyazrusiye, Burundi, Komorı, Kuba, Qıtay Halq Demokratik Cumhuriyeti, İran, Qazahistan, Myanma, Laos, Nikaragua, Filippinler, Rusiye, Sırbistan, Sudan, Suriye, Zimbabve.
Emine Ceppar, Ukraina Tış işler nazirligi Qırımnen bağlı yañı qarar leyhalarını BM Baş Assambleyasına berecek ola, dep bildirdi.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
