BM Baş Assambleyasınıñ üçünci komitetinde noyabrniñ 15-nde işğal etilgen Qırımda insan aqlarınıñ bozulmasına dair rezolütsiyanıñ yañı leyhasına rey berilecek, dep bildirdi Ukraina haber siyaseti naziriniñ birinci muavini Emine Ceppar.
Onıñ aytqanına köre, vesiqanıñ yazılmasında 30-dan ziyade memleket iştirak etti. Noyabrniñ 15-nde rey berilgen soñ leyha BM Baş Assambleyasına yollanılacaq, anda ise bu sene dekabr ayında rey berilmesi beklenile.
«Leyha Rusiyeniñ Qırımda yapqan cinayetleri aydınlatılğan qabaat qısımdan ibaret: Qırımda Ukraina vatandaşlarına avtomatik berilgen Rusiye vatandaşlığı ve razı olmağanlarnıñ sürgünligi, farqlı tüşüngenlerge qarşı azap ve maneviy basqı, cinayet işlemegenlerden «qabaatlarını tanımalarına» irişmek içün azap usulları, ğayıp oluv ve siyasiy taqip, siyasiy sebeplerden açılğan davalar, Meclis yasağı ve qırımtatarlarnıñ temsilci organınıñ «ekstremist» teşkilât olaraq ilân etilmesi, siyasiy maqsadlarda terrorizm ve ekstremizmge qarşı qanunlarnıñ qullanılması; Ukraina kütleviy haber vastalarınıñ blok etilmesi ve Ukrainanıñ dalğa resurslarınıñ qallunılması», – dep aytıla Facebooktaki haberde.
2017 senesi dekabrniñ 19-nda BM Baş Assambleyası «Qırım Muhtar Cumhuriyeti ve Aqyar şeerinde (Ukraina) insan aqları vaziyeti» rezolütsiyasını qabul etken edi.
Rey berüvde 70 memleket vesiqağa «ebet» dedi, 26-sı qarşı çıqtı ve 76 memleket bitaraf oldı.
Beyazrusiye, Ermenistan, Rusiye, Suriye, Zimbabve ve diger memleketler rezolütsiyağa qarşı çıqqan edi. Vesiqada Rusiyeden BM Halqara mahkemesiniñ tevsiyelerini yerine ketirip, Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasilniñ temin etmesi talap etile.
