Birleşken Milletler Baş Assambleyasınıñ üçünci komiteti cumaaqşamı künü, noyabrniñ 15-nde, «Qırım Muhtar Cumhuriyetinde ve Aqyarda insan aqları vaziyeti» qararınıñ yañartılğan leyhasını baqacaq, dep bildire Ukrainanıñ BM Daimiy temsilciligi Twitterde.
Ukraina haber siyaseti naziriniñ birinci muavini Emine Ceppar bildirdi ki, vesiqanı 38 memleketniñ temsilcileri azırladı.
«BM üçünci komitetinde rey berilecek, dekabr ayında ise BM Baş Assambleyasına çıqarılacaq Qırım ve Aqyarda insan aqları vaziyetine dair rezolütsiyanıñ 38 müellif-memleketi bar. Yarın (noyabrniñ 15-nde – QA) müellif olğan memleketlerniñ tam sayısını bilecekmiz», – dep qayd etti Ceppar Facebook saifesinde.
Bugünki rey berüvden soñ leyha BM Baş Assambleyasına baqması içün yollanacaq, anda ise bu sene dekabr ayında rey berilmesi beklenile.
2017 senesi dekabrniñ 19-nda BM Baş Assambleyası «Qırım Muhtar Cumhuriyeti ve Aqyar şeerinde insan aqları vaziyeti (Ukraina)» qararını qabul etken edi.
Rey berüvde 70 memleket vesiqağa «ebet» dedi, 26-sı qarşı çıqtı ve 76 memleket bitaraf oldı. Beyazrusiye, Ermenistan, Rusiye, Suriye, Zimbabve ve diger memleketler rezolütsiyağa qarşı çıqqan edi. Vesiqada Rusiyeden BM Halqara mahkemesiniñ tevsiyelerini yerine ketirip, Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasilniñ temin etmesi talap etile.
