BM Baş Assambleyasınıñ üçünci komiteti «Qırım Muhtar Cumhuriyeti ve Aqyarda insan aqları vaziyeti» qararınıñ yañartılğan leyhasını qabul etti.
Vesiqağa 67 memleket rey berdi, 26-sı qarşı çıqtı, 82-si bitaraf oldı.
Qırım rezolütsiyasınıñ yañartılğan leyhası baqılacağını Ukrainanıñ BM Daimiy temsilciligi haber etken edi.
Ukraina Tış işler naziriniñ muavini Sergiy Kıslıtsâ, Qırımdaki insan aqları qararına ne kirsetilgenini añlattı. Onıñ aytqanına köre, vesiqağa Rusiye ve Qırımda siyasiy sebeplerden tutulğan ukrainalılar aqqında madde kirsetildi.
Noyabrniñ 15-nde olğan rey berüvden soñ leyha BM Baş Assambleyasına baqması içün yollanacaq, anda ise bu sene dekabr ayında rey berilmesi beklenile.
2017 senesi dekabrniñ 19-nda BM Baş Assambleyası «Qırım Muhtar Cumhuriyeti ve Aqyar şeerinde insan aqları vaziyeti (Ukraina)» qararını qabul etken edi.
Rey berüvde 70 memleket vesiqağa «ebet» dedi, 26-sı qarşı çıqtı ve 76 memleket bitaraf oldı. Beyazrusiye, Ermenistan, Rusiye, Suriye, Zimbabve ve diger memleketler rezolütsiyağa qarşı çıqqan edi. Vesiqada Rusiyeden BM Halqara mahkemesiniñ tevsiyelerini yerine ketirip, Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasilniñ temin etmesi talap etile.
