BM insan aqları yuqarı komissarınıñ idaresi Rusiyeniñ Ukrayınağa qarşı büyük istilâsı neticesinde 7199 insannıñ ölümini ve 11756 kişiniñ yaralanğanını tasdıqladı. Bu malümat 2022 senesi fevralniñ 24-nden 2023 senesi fevralniñ 12-ne qadar müddetke aittir.
Fevralniñ 1-nden 12-ne qadar 59 Ukrayına barışıqsever sakininiñ ölümi ve 203-niñ yaralanğanı qayd etildi.
Teşkilât elâk olğanlarnıñ kerçek raqamı daa yüksek, çünki uruş areketleri devam etken bazı yerlerden malümat yavaş kele ve tasdıqlanmalı, dep qayd ete.
«Bu, meselâ, Mariupol (Donetsk vilâyeti), İzüm (Harkiv vilâyeti), Lısıçansk, Popasna ve Severodonetsk (Lugansk vilâyeti) mesken yerlerinen bağlı, berilgen malümatqa köre, anda bir çoq vatandaş öldi ya da yaralandı», – dep aytıla haberde.
Birleşken Milletler ğayıplarnıñ çoqusı büyük zarar alanı olğan patlayıcı silâ, ağır top ve toplu ateş reaktiv sistemaları, raketa ve ava darbeleriniñ qullanıluvınen bağlı, dep qayd ete.
Umumen cenk vaqtında Ukrayında yerli sakinlerniñ onlarnen kütleviy öldürilüvi qayd etildi. Bıltır mart ayında Buça ve İrpin Ukrayına ordusı tarafından azat etilgen soñ yedi yüz vatandaşnıñ cesedi tapıldı. O ayda Rusiye aviatsiyası Mariupol drama teatrini bombalağanı içün, Ukrayına akimiyetiniñ malümatına köre, tahminen 300 insan elâk oldı. 50 barışıqsever sakin aprel ayında Kramatorsk vokzalına kerçekleştirilgen raketa darbesi neticesinde elâk oldı, 48 kişi Çasiv Yar şeerinde çoq qatlı evge açılğan ateş neticesinde can berdi, o ayda Vinnıtsâğa qarşı raketa darbesi neticesinde 27 insan elâk oldı. Avgust ayında, Ukrayına mustaqilli kününde, Rusiye Dnipropetrovsk vilâyetiniñ Çaplıno tren stantsiyasına raketadan darbe endirip, 25 vatandaşnı öldürdi. Oktâbr ayında eñ büyük raketa darbelerinden biri vaqtında 30-dan çoq barışıqsever sakin elâk oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
