Avropa Birliginiñ 27 memleketi Ukrayinağa resmiy olaraq Avropa Birligine qoşulmaq içün namzet statusını bermek niyetindeler. Bunı Bloomberg agentilgi bildire.
Agentlikniñ malümatına köre, bazarertesi künü olıp keçken AB memleketleri elçileriniñ körüşüvinde iç kimse bu qararğa qarşı çıqmağan. Böyle statusnı Moldovağa da bermek azırlar.
Namzet statusınıñ berilmesi ya da berilmemesi aqqında soñki qarar iyünniñ 23-24-nde Brükselde keçirilecek sammit vaqıtnda alınacaq.
Keçken afta Avropa Komissiyası Ukrayina ve Moldovağa Avropa Birligine qoşulmaq içün namzet statusını bermege tevsiye etti.
Fevralniñ 28-nde Ukrayina prezidenti Volodımır Zelenskıy AB azalıq arizasını imzaladı.
Ukrayinağa azalıq namzeti statusınıñ berilmesine dair qarar bir ağızdan qabul etilmelidir.
Ukrayinağa "namzet statusı" berilgen taqdirde tam azası olmaq içün memlekette bir sıra islâat keçirmek kerek olacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
