Ukrayina ordusı Kursk vilâyetinde zapt etilgen topraqlarnıñ aman-aman yarısını ğayıp etti, qalğanlarını ise bir qaç ay içinde ğayıp ete bile. Bu aqta Bloomberg öz menbalarına atıf etip bildire. Agentlikniñ subetdeşleriniñ aytqanına köre, bu, Ukrayinanıñ Rusiye ile ateş toqtatıluvı aqqında muzakerelerde mevamını zorlaştıra bile.
Askerlerniñ qıtlığı ve silâ teminatınıñ belgisizligi sebebinden topraqlarnı tek baarge qadar tutmaq mümkün, dep sayalar menbalar. Bundan soñ arbiy quvetler ya çekilir, ya da sarıp alınma telükesi bar.
Amerika memurları, Bloomberg ile subetleşip, Ukrayina quvetleri, ABD-nıñ Rusiyege qarşı darbeler içün raketalarnı qullanmağa ruhset bermesi sayesinde beklenilgeninden daa çoq dayandı, dep qayd ettiler. Aynı zamanda, menbalarnıñ aytqanına köre, Kıyivniñ esas maqsadı topraqlarnı tutmaq degil de, istilâcı qabiliyetini numayış etmektir, bu ise ZSU-nıñ taktik muvafaqiyetidir.
Bazı ekspertler, Ukrayina prezidenti Volodımır Zelenskıy büyük zararlardan qaçınmaq içün keri çekilmekni emir ete bile, dep tahmin eteler. Ukrayina lideriniñ ofisi Bloombergge izaat bermedi.
Kursk ameliyatı, Ekinci cian cenkinden berli çetel devletniñ Rusiyege ilk quru istilâsı oldı.
Kurskqa ücüm etip, Ukrayina ordusı Rusiyeniñ Ukrayina şarqında ve şimaliy-şarqında ücüm etkenini toqtatmaq, Rusiyeni küçüni çekmege mecbur etmek ve kelecekte barışıq muzakerelerinde Kıyivge qoşma tesir etmek niyetinde edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
