Qırımtatar vatandaş jurnalisti, bloger Nariman Memedeminovnıñ imayesi bir aftadan berli onıñ bulunğan yerini bilmey. Bu aqta Memedeminovnıñ advokatı Edem Semedlâyev Qırım.Aqiqat mühbirine haber etti.
«İyünniñ 5-nden berli Nariman aqqında bir malümat yoq. Aqmescit SİZOsında olmağanını bilemiz, amma Rostov-na-Donuğa (Rusiye) da ketirilmedi. Vaziyet normal degil. Bulunğan yerini ögrenmek içün Rusiye Cezalarnı yerine ketirüv federal hızmetine muracaat azırlaymız», – dep ayttı Semedlâyev.
İyünniñ 10-nda Rostov-na-Donunıñ Şimaliy-Kavkaz okrugınıñ arbiy mahkemesi Memedeminovnıñ dava temeli boyunca ilk oturışuvnı başqa künge qaldırdı, çünki o, Aqmescit SİZOsından Rostov-na-Donuğa ketirilmedi.
Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi mayısnıñ 29-nda qırımtatar vatandaş jurnalisti, bloger Nariman Memedeminovnıñ davasını iyünniñ 10-nda baqmağa qarar aldı.
Mayısnıñ 7-nde Kreml kontrolindeki Qırım Yuqarı mahkemesi Nariman Memedeminovnıñ sıñırlav tedbirini 2019 senesi iyünniñ 15-ne qadar uzattı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
